Bus’ agu nanga tigri (copyright Herwin Hooplot)
Bus’ agu si tigri, di no sabi fu swen, fadon na watra. Wé a pis’teng di tigri e feti fu no dede watra dede, a bari krei kar’ bus’ agu: brada, mi mati, mi e begi yu kon yep’ mi!!!!!!!. Bus’ agu ben tenapu na syoro sei e luku fa tigri e feti fu k’moto ini banawtu fu watra dede. Bus’ agu ben sa wani yep’ tigri, ma tye……., a frede! Fu dat’ mek’ a taigi tigri: “noh, te mi pur’ yu na watra, yu o nyan mi”. A pis‘teng datti tigri e bar’ banawtu krei, e djeme so….heh heh heh, bikasi a watra ben kon bigin doro na en mofosei. Dan a bar’ aksi bus’ agu: “fa mi kan du so wan lagi sani, fu nyan yu, di yep’ mi??
Tye poti…………! Bus’ agu sari tigri en a bribi en, dan a langa wan tiki gi tigri. Da a har’ tigri kon na syoro! Ai mi boi! Lek’ fa tigri doro syoro en a kis’ en blo baka a grabu bus’ agu na en gorogoro. Bus’ agu skreki so kefalek tak’ ala en skin bigin lon krote! Bus’ agu now begin tya begi e bar’ krei gi tigri fu no nyan en. Den watr’ai fu bus’ agu ben de someni tak’ den fadon tap’ tigri tongo. Di tigri tesi a watr’ai fu bus’ agu tap’ en tongo, a nak’ en tongo so ehhh!!! Dan a lafu, a taigi bus’ agu: “boi yu watr’ai swit’ no todo, we yu meti mus’ fu switi tantoooohhhh!!!” Mi boi, fos’ yu ping’ yu ai tigri nyan bus’ agu te en kri boi baka iri.
Herwin Hooplot